Бидний өмнө мэдээлж байсан Windows 7 үйлдлийн системийн албан ёсны хувилбар нь олон нийтэд энэ оны 10-р сарын 22-нд хүрэх бөгөөд мөн компьютер үйлдвэрлэгчид өөрсдийн бүтээгдэхүүнд суулган борлуулах боломжтой болно гэдгийг Microsoft корпорациас мэдэгдсэн байна.

2007 онд худалдаанд гарсан Vista нь төдийлөн амжилттай борлогдоогүй бөгөөд олон асуудлуудтай байсан нь Microsoft корпорацийг дараагийн системээ хурдан олон нийтэд хүргэхийг шаардсан юм. Windows 7 нь өмнөх Vista хувилбарын боломжуудыг сайжруулсан төдийгүй олон шинэ боломжуудыг хэрэглэгчдэд нээж байгаа билээ. Одоогоор яг эцэслэн шийдээгүй байгаа ч гэсэн Windows 7 гарахын өмнөхөн Vista худалдан авсан хэрэглэгчид нэг бол үнэгүй, эсвэл хямдралтайгаар Windows 7-г авах боломжтой гэдгийг Microsoft-н дэд ерөнхийлөгч Bill Veghte мөн дурдсан байна.

Мөн Vista үйлдлийн систем хэрэглэгчид тодорхой хэмжээний хөнгөлөлттэй нөхцлөөр үйлдлийн системээ сайжруулах боломжтой байх "Technology Guarantee" схемийг танилцуулах бололтой.

Windows 7 нь Starter, Home Premium, Professional, Enterprise, Ultimate гэсэн 5 төрлийн хувилбараар гарах бөгөөд эдгээр нь үнэ болон боломжуудаараа ялгагдах юм. Windows 7 Basic хувилбарыг хөгжиж буй шинэ зах зээлүүдэд борлуулна гэж төлөвлөжээ. Гэхдээ шинэ үйлдлийн системийн үнэ тодорхойгүй хэвээр байгаа бөгөөд 2 долоо хоногийн дараанаас мэдэгдэж магадгүй байна.

Одоогийн хамгийн сүүлийн хувилбар нь Windows 7 Release Candidate 1 build-7137 байгаа юм.