Та сүүлийн үед шинэ зөөврийн компьютер худалдан авсан эсвэл харсан бол түүн дээр "Designed for Windows XP, Vista Ready" эсвэл "Vista Capable" гэх мэт юмнууд наасан байхыг үзсэн биз. Тэгвэл энэ нь бас худлаа ч байж болох ажээ.

Энэ оны 3 сард эхэлсэн шүүхийн маргаан дээр нэгэн шуугиан дэгдээсэн зүйл нэмж олдсон нь Microsoft болон Intel компаниудын удирдах ажилчдын хооронд бичилцсэн и-мэйлүүд юм. Microsoft Vista үйлдлийн системийг, тэр дундаа өнгөлөг Aero боломжийг ажиллуулах техникийн үзүүлэлтийн доод шаардлагыг гарган, шаардлага хангасан компьютер дээр "Vista Capable" гэсэн наалтаар баталгаажуулах ажиллагааг Microsoft төлөвлөж байжээ. Энэхүү төлөвлөгөөгөө бодож байснаасаа 3 сарын өмнө эхлүүлэхээр шийдсэнд Intel-нхэн дургүйцсэн байна. Үүний гол шалтгаан нь Intel-н 915 chipset нь Vista ажиллуулах шаардлагыг хангахгүй байсан бөгөөд шаардлага хангах чипсет үйлдвэрлэн гаргах гэсээр байтал эдийн засгийн хийгээд бизнесийн хувьд нилээн алдагдал хүлээхээр байжээ.

Тиймээс Intel-ийнхэн Microsoft-той нууцаар яриа хэлцэл хийсний үр дүнд Microsoft-ийнхон Vista-гийн шаардлагаа зохиомлоор доошлуулан гаргасан байна. Энэ нь эцсийн хэрэглэгчдийн хувьд буруу компьютер худалдан авах, өөрийн компьютер дээр ажиллах боломжгүй Vista худалдан авах гээд олон асуудал үүсгэх байсныг аль аль компани мэдэж байсан ч өөрсдийн бизнесийг бодсон алхам хийсэн нь шүүхийн хаалга татах үндэс болоод байна.

Тэгэхээр Vista-гийн асуудал нь зөвхөн өөрөөс нь болоод зогсохгүй бас түүнийг зохион бүтээн гаргасан компаниас болон хүндхэн байдалд ороод байна.