Обамагийн засгийн газар ажлаа аваад удаагүй байгаа энэ үедээ олон чухал шийдвэр гаргаж байгаагийн нэг нь Вивек Кундра-г Ерөнхий Мэдээллийн Технологийн Даргаар (Chief Information Officer) томилсон томилгоо байлаа. Өчигдөр хийсэн энэхүү мэдэгдэл нь олон сонин сэтгэгдэл төрүүлж байгаа бөгөөд гол учир нь ноён Кундра чөлөөт нээлттэй эхийн програм хангамжийг ихэд дэмжин өмнөх ажлууддаа өргөнөөр хэрэглэж ирсэн юм.

Одоо 34 настай Кундра нь Энэтхэгт төрөөд бүүр багаасаа АНУ-д шилжин амьдарсан бөгөөд шилдэг залуу улс төрчдийн нэг гэгддэг ажээ. Тэрээр Обамагийн технологийн бодлогын зөвлөхөөр ажиллаж байсан бөгөөд 2007 оноос Вашингтоны Ерөнхий Технологийн Даргаар ажиллахдаа нээлттэй эхийг дэмжин, Вашингтоны 600 ажилтантай 86 агентлагийг удирдан ажиллахдаа Google болон Apple зэрэг компаний шийдлүүдийг ашиглан төрийн ажлыг илүү нээлттэй, үр өгөөжтэй болгосон гэж үнэлэгддэг байна.

Энэхүү шинэ ажилдаа АНУ-ын төрийн байгууллагуудын мэдээллийн технологийн бодлого, төсөв санхүүг удирдахын зэрэгцээ мэдээллийг нээлттэй, найдвартай арга замаар түгээх шинэ төслүүдийг хариуцан ажиллана. Дотоод болон гадаад вэбсайтуудыг бүтээхдээ ямарваа нэгэн үйлдлийн системээс хамааралгүй чөлөөт системийг чухалчилдаг бөгөөд төрийн байгууллагуудад мэдээлэл үүсгэх, солилцох үйл ажиллагаанд технологийг улам гүнзгий нэвтрүүлэхээр ажиллах ажээ.

Тэгэхээр бид ч юунаас хоцрох билээ. Манай Монголын компаниудын хувьд аливаа газар (ялангуяа төрийн байгууллагуудад) програм хангамж зохиож өгөхдөө хаалттай эхээр хийдгээс болоод өөрчлөлт шинэчлэлт хийхэд хэцүү байдаг, бусад системүүдтэй холбоход зориулагдсан EDI (Electronic Data Interchange) хэрэглэдэггүйгээс системийн бүтээгдэхүүний/мэдээллийн хэрэглээ нь хязгаарлагдмал болчихдог, хэдхэн жилийн дараа дахин хөрөнгө зарцуулан шинээр хийдэг гэх мэт асуудлууд ажиглагдсаар байгаа билээ. Тийм учраас аливаа үйлдлийн систем, аливаа платформоос хамааралгүй уян хатан системүүдийг, нээлттэй эхийн зарчмаар бүтээж эхлэх, тэр талын судалгааг хийвэл зохистой.

Мөн төрийн байгууллагуудад чөлөөт нээлттэй эхийн шийдлүүдийг хэрэглэх нь хөрөнгө мөнгөнөөс эхлээд цаашдын хөгжүүлэлтийн хувьд чухал ач холбогдолтой гэдгийг хэн бүгд хүлээн зөвшөөрөх бизээ.