Өдөржин компьютерын ард компьютерын гар дэрлэж, хулгана атгаж ажилладаг олон хүмүүст дуулгах сайхан мэдээ байна. Голландын анагаахын сургуулиудын судалгаанд тулгуурлан хүний биед тохирох байдал буюу эргономикийн сайн үзүүлэлттэй компьютерын хулгана бүтээжээ.

Hippus Handshoe Mouse буюу Гарны Гутал (уг нь бээлий гэмээр байтал) гэж нэрлэгдсэн энэ хулгана нь дундаж хүний гар тавихад яг таарах бөгөөд одоогоор зөвхөн баруун гарны хувилбар байгаа ажээ. Эрхий хуруу таарахаар том хонхорхойтой бөгөөд долоовор, дунд хуруугаар удирдаж болох энгийн 2 товчлуур, гүйлгэх дугуйтай юм.

Анагаахын их сургуулиудад энэ хулганаар асар их судалгаа хийсэн бөгөөд мэдээж олон хүний шаналдагаар компьютер дээр удаан ажилласны дараа бугалганы хэсэг хөшдөг эсвэл өвддөгийг хамгийн ихээр багасгах зорилгоор эргономикийг дээшлүүлэх зорилго тавьжээ. Ер нь бол дажгүй санаа хэдий ч энэ сайхан "тухтай" хулганыг $120-оор олж авах ажээ. Зарим хүний хувьд тав тухаас гадна хүмүүст гайхуулах гэж авч болох талтай. Жинхэнээр нь хэрэглэж байж л үзье даа.