Миний мэдэхийн анх Nokia 5510 гэдэг тоосго шиг гар утас Монголд орж ирснээр энэхүү алдартай гар утастай бид бүгд гар нийлэх болсон билээ. Олон төрлийн сайн үйлдэлтэй, сүлжээ дажгүй барьчихдаг, эдэлгээ сайн даадаг, ер нь бол итгэж болох энэ утсыг бүтээхдээ Nokia пүүс хэрхэн нарийн анхаардгийг та бүхэнд товч толилуулъя.

Бид өдөр болгон утсаараа оролдож эсвэл мессеж бичих гэж утасныхаа товчнуудыг нилээн хэдэн арван удаа, сардаа хэдэн мянга, жилдээ зарим нөхдүүд бүүр хэдэн сая дардаг билээ. Тэгвэл энэ бүхнийг туршдаг дараахи багаж нь утасны товчлуурыг төрөл бүрийн хурдаар, янз бүрийн өнцгөөс хэдэн сая удаа дарж туршсанаар бидний хурууны өндгөнд хамгийн тааламжтай байх товчийг Nokia хэрэглэдэг байна.

Бид санамсаргүй байдлаар утсаа бороонд норгох, эсвэл энд тэндээс үсчсэн усанд гар утсаа норгох тохиолдол байдаг шүү дээ. Тиймэрхүү нөхцөл байдлыг туршихдаа эхлээд маш олон зүүгээр усыг бороо шиг оруулан туршдаг байна. Мөн ус хэдэн тийш нь үсэргэн туршдаг төхөөрөмж ч мөн байдаг байна.

Дараагийн нэгэн туршилт бол шүдний оо, кетчуп, үсний гел гэх мэт бидний өдөр тутмын хэрэглэдэг шингэн зүйлсийн хохирогч болдог гар утсыг маань тэсвэртэй болгохын тулд Nokia бидний өмнөөс дусааж, тарааж, шингээж, дэвтээж туршин байж эдгээр хүнд туршилтуудыг давж чадах гар утсыг бүтээдэг ажээ.

Хөөрхий нилээдгүй гар утас нь эрчүүдийн өмдний халаас, бүсгүйчүүдийн жинсний арын халаас гээд эвгүй байдалд шахагдан уян хатан чанараа шалгуулдаг билээ. Гэхдээ бид нараас урьтаад Nokia бас л шалгачихдаг байна. Гар утсыг хөндлөн байдлаар нугалж үзэх ба мөн босоо байдлаас мушгиж ч туршин хэдий хирийн ачааллыг даах нь вэ гэдгийг тогтоон хүмүүсийн өдөр тутмын хэрэглээний хүчнээс дээд тал ньойролцоогоор 150% орчмыг даах боломжтой болтол сайжруулдаг.

Nokia-гаас дутахгүйгээр бидний туршдаг нэгэн туршилт бол мэдээж гар утсаа унагах юм. Санамсаргүйгээр алдаад унагах, санаатайгаар хана савах хийгээд 9 давхар орон сууцны шатны завсраар бүүр 9 давхраас унагаасан тохиолдлууд олон сонсогддог бөгөөд сонирхолтой нь ихэнх тохиолдолд гар утас нь ямар нэгэн гэмтэлтэй хэдий ч ажилласаар байх нь элбэг байдаг. Энэ нь Nokia-гийн унагаах туршилтын сайн үр дүн бөгөөд гар утсыг маш олон удаа унагаан туршдаг аж. Гэхдээ зөвхөн унагаагаад байхгүй бас давхар өндөр хурдны видео камераар бичлэгийг авч судалдаг байна. Ингэхдээ гар утас унах явцад аль эд анги нь ямархуу байдлаар туялзаж байгааг, товчлуурууд хэрхэн хөдөлж байгаа зэргийг судлан боломжит эмзэг цэгүүдэд нэмэлт боолт хийх, илүү хатуу материал хэрэглэх гэх мэтээр учирч болох эрсдлээс биднийг сэргийлдэг байна.

Бид гар утсаа халаасандаа хийх, цүнхний ёроолд хийх гэх мэтээр тоос шороо ихтэй орчинд авч явдаг билээ. Тийм ч учраас гар утасны тань дэлгэцэн дотор элдэв тоосонцор харагдаж эхэлдэг билээ. Nokia нь гар утаснуудыг нарийн тоос шороотой хайрцганд хийн эргэлдүүлэн хэдий хирийн тоос шороо орсон үед товчнууд гацах гэх мэт гэмтэл учирч болохыг дизайндаа анхаардаг байна.

Дараахи төхөөрөмжид олон хэлбэртэй жижиг хатуу биетүүдтэй гар утсыг эргэлдүүлснээр утас нь аль хэсгээрээ хэрхэн зурагдаж байгааг судалдаг байна.