Интернетээр хэсч явах, флаш дискээр файл зөөх, и-мэйл хүлээн авах гээд бидний гүйцэтгэсэн өдөр тутмын ажил маань ажлын гол хэрэгсэл болсон компьютерыг эрсдэлд оруулж байдаг. Аюулгүй байдлыг хангахад хэцүү бас үнэтэй гэвэл бас ч тийм бишээ. Энгийн бөгөөд үнэгүй хэрэгслүүдийг зөв хослуулан хэрэглэснээр амархан шийдэх аргууд байна. Мэдээж Kaspersky Labs, Symantec, Norton гэх мэт сайн хамгаалалтын багцыг та суулган, амжилттай хэрэглэж байгаа бол өөрчлөх шаардлагагүй байх. Харин хулгайн програм хэрэглэж байгаа эсвэл хугацаа байн байн дуусаад байгаа бол үнэгүй юм хэрэглээд үзэх хэрэгтэй байх.

Хамгаалагчийн үндсэн үүрэг бол таны компьютерт суусан програм (эсвэл вирус) гадны сервер рүү зөвшөөрөлгүй, хортой хандалт гүйцэтгэн мэдээлэл дамжуулах эсвэл гадны сүлжээнээс Windows-н портууд руу халдах оролдлого зэрэг тнтернет хэрэглэхтэй холбоотой гардаг эрсдлүүдээс таны компьютерыг хамгаална.

Comodo Internet Security буюу түүнд багтсан Comodo Firewall Pro нь үнэгүй хамгаалагч програм бөгөөд та http://www.personalfirewall.comodo.com хаягаар орж хамгийн сүүлийн хувилбарыг үнэгүй (Free Download) татан авч болно. Та зөвхөн хамгаалагчийг суулгах эсвэл зөвхөн вируснаас хамгаалагчийг суулгаж болох бөгөөд аль алиныг багтаасан Comodo Internet Security хэлбэрээр суулгаарай.

Өмнөх хувилбаруудтайгаа харьцуулахад хамаагүй хурдан ажиллагаатай болсон бөгөөд та интернетээр байнга шинэчилж ажиллуулснаар өөрийн мэдээллээ алдах аюулаас хамгаалагдах болно.

Аливаа компьютерт зайлшгүй байж ёстой хамгаалалт бол мэдээж вирусны хамгаалагч бөгөөд Avira Antivirus Personal болон AVG Antivirus Free хувилбарууд нь сайн хамгаалалт болж чаддаг.

Avira Antivirus Personal програмыг http://www.free-av.com/ хаягаар хандан татаж аваарай.

AVG Free Antivirus програмыг http://free.avg.com/ хаягаар хандан татаж аваарай. Мэдээж энэ хоёр програмын аль нэгийг нь буюу тохиромжтой, хэрэглэхэд хялбар гэснийгээ сонгон хэрэглээрэй.

Avira Antivirus Personal

AVG Anti-Virus Free edition

Өнөө үед хамгийн түгээмэл тархаж байгаа Trojan Horse, Rootkit, Worms, Keylogger зэрэг хортой програмууд нь таны компьютерт мэдэгдэлгүй суугаад мэдээлэл хулгайлах, вирус тараах, спам и-мэйл цацах, таны үйлдлийг тагнуулдах зэрэг гэмт хэргийн шинжтэй үйлдлүүдийг хийдэг байна. Флаш дискээр дамжин тархаж байгаа вируснууд нь мөн энэ төрлийнх бөгөөд механик аргаар хэрхэн хамгаалах тухай бид "USB флаш дискний вируснаас сэргийлэх нэгэн арга" нийтлэлдээ бичсэн билээ. Үнэгүй бөгөөд нилээд сайн хамгаалагч програм бол MalwareBytes' Anti-Malware бөгөөд та энэ програмыг http://www.malwarebytes.org/mbam.php хаягаар орон үнэгүй татан авч хэрэглээрэй.

Төрөл бүрийн вирусыг маш сайн илрүүлж устгах бөгөөд та интернетээр үнэгүй шинэчилж болно.

Таны хандаж байгаа вэбсайт вирустээгүй эсэх болон жинхэнэ вэбсайт уу эсвэл хуурамч вэбсайт уу гэдгийг вэбээр аялах явцад тань шууд шалган мэдээлдэг McAfee SiteAdvisor нь Mozilla Firefox 3.x хувилбар дээр суудаг нэмэлт (Add-On) юм. Та манай вэбсайтны нүүр хуудсан дахь холбоосоор хандан Firefox вэб хөтчийг татан аваарай.

McAfee SiteAdvisor-ийг Firefox ашиглан http://www.siteadvisor.com/download/ff.html хаяг руу хандан татаж суулгах ба Internet Explorer вэб хөтчийг ашигламаар байгаа бол http://www.siteadvisor.com/download/ie.html хаягаар орж болно.

Энэ нэмэлт нь таныг интернетээр аялж байхад саад болохгүйгээр ажилладаг ба аюулгүй бол ногоон, аюултай гэж үзвэл улаан өнгийн анхааруулга гаргадаг. Мөн хуурамж эсвэл аюултай холбоосын хажууд тусгай сануулах тэмдэглэгээ гаргаснаар таныг тэр холбоосыг мэдэлгүйгээр дарахаас сэргийлж өгнө.

Өнөө үед бидний хүүхдүүд интернетээр ихэд аялах, чатлах болсон билээ. Санамсаргүй болон бусад шалтгаанаар насанд хүрэгчдэд зориулсан мэдээлэл үзэх, аюултай харгис шинж чанартай вэбсайт руу орох зэрэг олон эрсдлээс сэргийлэхийн тулд та "Эцэг эхийн хяналт" буюу "Parental Control" суулгавал зохистой. Үүнийг дээр дурдсан програмуудын зарим нь үнэгүй дагалдуулан оруулсан байдаг бол KidZui хэмээх энэ вэб хөтөч нь нилээн өвөрмөц онцлогтой юм.

Хүүхдүүдэд зориулсан энгийн хялбар дизайнтай, төрөл бүрийн сонирхолтой тоглоом, видеоний холбоосыг хүүхдэд сонирхолтой хэлбэрээр багтаасан энэ вэб хөтчийг http://www.kidzui.com хаягаар хандан татаж аваарай. Мөн Mozilla Firefox-д нэмэлт байдлаар суулгахыг хүсвэл https://addons.mozilla.org/mn/firefox/addon/9689 хаягаас татан аваарай.

Та өөрийн маш нууц гэсэн файлуудыг сайн нууц үгээр хамгаалан нууцлахыг хүсвэл үнэгүй, нээлттэй эхийн TrueCrypt програмыг туршаад үзнэ үү. Энэхүү програм нь өндөр түвшний AES256, Serpent, Twofish гэх мэт нууцлалын алгоритм ашиглан таны файл, дискийг хүссэн үед эсвэл байнгын нууцлалаар хангах боломжтой. Таны нууцалсан мэдээллийг тусдаа нэг диск мэтээр харагдуулан, хандах шаардлагатай бол нууц үг асуух болно. Мөн флаш дискэн дээрх мэдээллийг ч нууцлах боломжтой энэ програм нь төрөл бүрийн үйлдлийн системд зориулагдан гарсан болно.

Та дэлгэрэнгүй мэдээлэл, татан авах холбоосыг http://www.truecrypt.org вэбсайтаас авна уу. Мэдээж сайн уншиж судлан, янз бүрийн турших нь зүйтэй гэж зөвлөмөөр байна. Хамаг мэдээллээ нууцалчихаад нууц үгийг нь мартчихвал хэцүүхэн юм болно шүү дээ.